Palazzo Locatelli - Piazza XXIV Maggio, 22 - Tel 0481.637111, Fax 0481.637112


Ricercje

Ricercje svelte

Ricercje avanzade



Tu ti cjatis chi: Comun > Cultura e turismo > Museus


statua

MUSEU CIVIC DAL TERITORI

Lis colezions Canciani, i edits asburgjics restaurâts, i satûi cidins che a platin

limited editions dal Vin da la Pâs. Testemoneancis di un museu gnûf dulà che il lavôr, la tiere e la vît a deventin art.

La nassite

Il Museu Civic dal Teritori di Cormòns al è stât screât ai 18 di Mai dal 2002 e par cumò al à dôs sezions: la prime e je stabile e dedicade al scultôr Alfonso Canciani, la seconde e à un spazi pes esposizions di mostris temporaniis, fin che no si varan a disposizion altris locâi par inmaneâ une sezion storiche organiche e par frontâ ancje l’argoment da la produzion vinicule, une vore innomenade tal teritori.

Il Museu al è sistemât intune ale dal Palaç Locatelli, dal Sietcent, e al da su la sugjestive Place XXIV maggio; par doi secul il Palaç al è stât proprietât di une impuartante famee di barons. Cumò al è la sede dal Municipi.

Par jentrâ tal Museu si passe pal zardin interni dal palaç, che al à mantignût i caratars di un piçul zardin talian.

Il Museu al è sistemât su doi plans. Tal plan tiere, dulà che si prontin lis esposizions temporaniis, e je in mostre une limitade ma significative racuelte di tocs di afrescs da la Ete di Mieç – cjatâts di pôc di ce che al reste da la glesie di S. Antoni, dongje di place Libertât. Par cui che al à gust di cognossi plui insot il patrimoni artistic e dal paisaç e je a disposizion une postazion Macintosh, par consultâ il grant repertori di imagjinis e schedis par une visite virtuâl di Cormòns e dal so teritori.

Ta la sezion permanente dal Museu - tal prin plan – si conservin lis oparis di Alfonso Canciani (1863-1955) nassût a Breçan, no lontan di Cormòns, e deventât un scultôr preseât ta la Vienne di Klimt, dopo di vê scomençât tant che sempliç pichepiere.
Lis sôs oparis a son stadis regaladis tal 1993 da la fie dal scultôr, Nerina (1909-1995) che e à lassât a la citât diviers lavôrs che a documentin dute la cariere dal artist, dal Lavoratore stanco (1890), che i de la pussibilitât di jentrâ ta la Scuele di sculture da la Academie di Viene, al famôs Lanciasassi (1894) che, in copie, al è stât sistemât ta la place denant dal Municipi, ai ritrats fats tai agns passâts a Viene e, alfin, a lis oparis fatis tra il 1920 e il 1949, cuant che al viveve e lavorave a Triest.

La opare plui grandiose, il studi pal Monument a Dante (1896), che al presentâ a la Bienâl di Vignesie tal 1899 e al cjapà il premi a la Secession vienese (1900), si pues amirâ ta la capele di Palaç Locatelli, che si jentre di une altre bande dal zardin.

Par la fuarte vocazion vitivinicule di Cormòns, une sezion dal Museu Civic dal Teritori e je riservade a la esposizion da la serie complete da lis butiliis dal Vin da la Pâs, buridis fûr da la Cantine Produtôrs Cormòns cul contribût creatîf di grancj artiscj di cumò, come Music, Baj, Fiume e v.i.