Palazzo Locatelli - Piazza XXIV Maggio, 22 - Tel 0481.637111, Fax 0481.637112


Ricercje

Ricercje svelte

Ricercje avanzade



Tu ti cjatis chi: Comun > Cultura e turismo > Storie


UN POCJE DI STORIE

La storie dal insediament

Gonfalone
gonfalone

Cormòns (13° 40’ 08’’ di longjitudin est, 45° 90’ 04’’ di latitudin nord, m. 63 s.l.m.).

Il non al rimande a un substrât linguistic prelatin: al varès di derivâ di un non di persone o di popul ("Carmo"). Di chel stes non al varès di jessi saltât fûr ancje il non di une tribù, i "Galli Carmones" o "Carmonenses".
Il non de tribù al ven dal totem che a vevin fat di une bilite ("carmùn" in lenghe retoromanze) o di un armelin ("harmo" par todesc antîc). Come che si viôt di cheste etimologjie, Cormòns al è un insediament antîc.

Lu incorone un paisaç vari, che l’om al à lavorât cul lâ dal timp, cence mai gjavâi la sô bielece.

Tantis a son lis testemoneancis de storie dal puest e des personis che a àn vivût culì: lis stradis che a dividin la planure, lis vignis che a disegnin lis culinis, i cjamps e i cjasâi, lis vilis, i palaçs, i monuments, lis cjasis e i curtîi, i tors e lis glesiis, i rescj archeologjics. Ma cul lâ dal timp chestis testemoneancis a van al mancul.

Un esempli al è chel de mont Quarine. I romans le cjaparin cun dute la colonie di Aquilee (181 prin di Crist), e al è probabil che parsore i meterin une fuartece par inserîle tal sisteme di difese che a faserin sù vie pal II secul dopo di Crist, dopo des invasions dai Cuadis e dai Marcomans. Al è ancje probabil che, vie pal V secul, sul cuel la int si sedi riparade dai barbars, che a jerin daûr a fâ i lôr spostaments. In ete langobarde, la fuartece (castrum) su la mont Quarine e resistè a la invasion dai Avars, sui prins dal VII secul. Un vincj agns dopo, tal 628, Cormòns e deventà sede patriarcjâl.

Dopo dal "schisme dai trê Cjapitui", une lote ingredeade par motîfs religjôs e politics, a forin elets tal stes timp doi patriarcjis: un si riparà a Grau, e chel altri al trasmudà la sede patriarcjâl a Cormòns, plui sigure e no masse lontane di Aquilee, che e jere ancjemò da cjâf de provincie.

castello di Cormons
rievocazione storica

Cul lâ dal timp, man a man che i langobarts a rivarin adore a integrâsi ben cui romans, e che il podê politic al cjatà l’acuardi cui vescui e cu la glesie di Rome, il pericul dal schisme al passà, une volte ricognossude la legjitimitât di dutis dôs lis sedis patriarcjâls, tal 731.

Tal 737, il patriarcje di Aquilee si trasmudà a Cividât, sede dai duchis langobarts e centri dulà che e tornave a flurî la vite citadine, duncje miôr di Cormòns, ridusût a centri rurâl di cuant che la linie di difese e jere stade spostade a tramontane, dulinvie la Drave.

Il cjistiel su la mont Quarine i de un ripâr a la int cuant che a rivarin jù i Ongjars, fra i secui IX e X. Intant che Oton I al jere daûr a dâ une gnove organizazion al podê imperiâl, al donà la localitât sot de mont al patriarcje di Aquilee (964). Ta chest teritori i munistîrs a vevin i lôr cjamps, e par li a passavin pes stradis trafics e pelegrins: duncje il puest al jere tornât a jessi vonde strategjic. E di fat al jere deventât la sede dai scambis e des contesis pe redistribuzion des jurisdizions dai podês publics, che in chê volte a jerin leâts al possès de tiere, fra i munistîrs e i conts di Gurize, avocats dai patriarcjis di Aquilee, duncje fra i conts e i patriarcjis.

Il conflit pe sovranitât su Cormòns, frontiere fra doi dominis che a smiravin a vê ognidun la supremazie regjonâl, al jere une cuistion di nivel locâl, ma inseride tal contest slargjât de lote fra il podê imperiâl e chel papâl pal domini su la penisule. Si sierà cu la atribuzion dal cjistiel di Cormòns ai conts di Gurize su la fin dal Dusinte cuant che, intant che il papât al leve a finîle sot de France, il patriarcjât di Aquilee, di avampost cuintri lis fuarcis imperiâls, al jere ridusût a entitât periferiche. Par vie che a jerin saldo in vuere, i popui a costruivin struturis di difese minimis ancje sot de mont: lis centis, che a van indaûr al secul XIII, o adiriture al X. In cualchi câs si lis ricognòs ancjemò tune struture urbane un grum trasformade. Il cjistiel, sometût al control diret dal cont di Gurize, al ospitave une guarnigjon di oms a lui leâts di un rapuart di fedeltât, che si insediarin e a formarin lis fameis plui impuartantis dal puest: Sbroglio, Neuhaus, Floyaner, Dornberg, Strassolt e Ungrispach: di lôr il comun di Cormòns al à cjapât il so steme.

Vignesie e ocupe il patriarcjât di Aquilee

La situazion e gambià nome dopo che il patriarcjât di Aquilee al passà sot dai Venezians (1420).

I conts di Gurize si cjatarin dentri tun zûc politic cun grandis potencis: Vignesie, i Asburcs, la Ongjarie sot di Mattia Corvino. Par parâsi cuintri dai Turcs che a rivavin de "Carniola" e che fra 1477 e 1478 a fiscarin ancje Cormòns, la Serenissima e ordenà la costruzion di fuartecis dulinvie dal Lusinç, in teritori gurizan. Lenart, ultin cont di Gurize, al rispuindè cu la firme di un pat dinastic cui Asburcs. Tal 1497 i de a Massimilian I i cjistiei gurizans sul teritori furlan, ancje chel di Cormòns, e cussì al anticipà di cualchi an la complete devoluzion de contee ai Asburcs tal 1500, dopo de muart di Lenart.

Ta chel stes an l’imperadôr Massimilian al confermà i statûts che la comunitât de vile di Cormòns si jere dade a partî dal 1436 par regolâ la ativitât des sôs istituzions, dulà che i paisans e i abitants de zone dal cjistiel a vevin vût mût di integrâsi. Al confin fra i dominis dai Asburcs e de Serenissima, une volte passât sot de Austrie il cjistiel di Cormòns al viodè a cressi la sô impuartance strategjiche. Finide la lote fra Vignesie e l’imperi, tal 1508 al passà sot di Vignesie, che lu pierdè e lu tornà a cjapâ tal 1511. Tornât sot de Austrie tal 1514, a la fin al fo sdrumât.

Cormòns, passade in definitive sot dai Asburcs cu la pâs di Worms (1521), tocjade dome in part dal conflit fra Austrie e Vignesie dal 1615-1617, e ve mût di disvilupâ la sô funzion di centri di scambis in graciis de sô posizion sul confin venit e dal fat che part dal Cuei e cor su la sô planure. Fra Sîscent e Sietcent i intervents edilizis, ducj colegâts fra di lôr, a gambiarin la fisionomie de vile, che une volte e jere indotade di struturis di difese. In dì di vuê, in graciis de sô posizion, Cormòns (7.530 abitants) e je la vile plui popolade dal Cuei e il pont di incuintri di areis economichis diferentis: chê forestâl e di produzion vinicule tipiche de culine, e chê agricule e industriâl de planure.