Palazzo Locatelli - Piazza XXIV Maggio, 22 - Tel 0481.637111, Fax 0481.637112


Ricercje

Ricercje svelte

Ricercje avanzade



Tu ti cjatis chi: Comun > Teritori > Ambient > La struture dal paisaç


La struture dal paisaç

In dì di vuê si decît cemût doprâ un teritori in sens economic daûr di ce morfologjie che al à. Te zone di Cormòns, cussì come par dut sul planete, la morfologjie nus mande indaûr a la preistorie, cuant che la tiere e la aghe a vevin une distribuzion diferente di chê di cumò. Fra 70 e 38 milions di agns indaûr, tal Eocene, lis culinutis dal Cuei a jerin taponadis dal dut dal mâr, sierât a nord di une scoiere di calcâr, sù par jù dulà che vuê a son lis Alpis Cjargnelis e Juliis e il Cjars. La erosion des ondis che a levin a sbati cuintri de bariere e determinà la formazion di grancj dipuesits di detrîts. I materiâi sedimentâts, pantan e arzile calcarie, si trasformarin in ponchis; i detrîts plui grues, par cementazion, in arenariis. I grancj moviments dal teren a puartarin chestis massis tal sut; i fenomens climatics e il formâsi di riui lis lavorarin fin che no deventarin i rilêfs di cumò. Tal Cuei i strâts di arenarie si alternin a lis ponchis, e a formin cussì une cualitât di teren che si clame 'flysch di Cormòns' o ponche. Plen di vîts, al è une vore sogjet a fenomens di erosion, tant che par podê implantâ i vignâi sui roncs si à scugnût fâ teracis. I versants dal Quarin a son fats pal plui di arenarie; i crets a saltin fûr o pûr a restin taponâts nome di un strât sutîl di tieriç rossit. La zone no je tant morbide, duncje e je lassade pal plui a bosc.

La ploie che no jentre tal teren e cor jù pes clevis, e forme grispis ertis e canâi, e si mene daûr i materiâi plui fins e incoerents. Sot des monts duncje si son cumulâts i sediments di arzile, che te concje dal Preval a àn formât un strât impermeabil, a tindince paludose, risanât cun intervents di bonifiche.

Di sot de mont jù bande de planure, che si slargje tal triangul fra la confluence dai flums Judri e la Vierse, i terens di arzile si unissin planc a planc a detrîts di glerie, e a deventin plui morbits. A est de scarpade dal Judri si slargje invezit une grande zone mancul produtive, cun terens di glerie o ferets, derivâts di procès leâts aes flutuazions glaciâls de ete cuaternarie, finidis un 10.000 agns indaûr, e in superficie a presentin un strât di tiere russite e di claps.