Palazzo Locatelli - Piazza XXIV Maggio, 22 - Tel 0481.637111, Fax 0481.637112


Ricercje

Ricercje svelte

Ricercje avanzade



Tu ti cjatis chi: Comun > Teritori > Risorsis naturâls > Il vignâl


Il Vignâl

vendemmia

A Cormòns e tal Cuei la vît e je dispès la uniche colture, za a partî de Ete di Mieç. Lis primis menzons di vignâi a van indaûr ai prins dal Dusinte. Dopo, altris testemoneancis a fevelin di cjamps no cuissà ce grancj, pal solit da pît de Mont Quarine e su lis clevis daûr dal paîs. E, intant che i statûts des comunitâts dal puest a jerin daûr a prudelâ, tor de metât dal Cuatricent, la produzion de ue, insiemit cun chê des ulivis, altris documents di chel stes periodi a svantavin za la bontât dal vin di Cormòns.

Il vin al jere o blanc o neri. Par fâlu si miscliçavin lis tantis varietâts di ue che a vignivin sù di bessolis. Plui tart, sul Sietcent, za che il gust al leve a gambiâ, cuant che la Glesie e tacave a jessi plui tolerante e i nobii a tacavin a mostrâ i lôr vistîts di lusso, i contadins a començarin a selezionâ lis varietâts dal vin che a produsevin. Di chê volte il Cuei al deventà zone di produzion de Ribuele (Rebula par sloven) e dai vins blancs dolçs. A jerin facii di vendi tai paîs de Europe centriorientâl, che tal vin a cirivin plui il soreli che la tiere. La tiere le cjatavin tal vin neri, penç e scûr, che ur faseve di aliment, di medisine e, par cui che i ’ndi beveve masse, di mieç par no pensâ e par dismenteâ la fature di vivi.

Ancje dongje Cormòns, a Dobre (vuê Dobrovo su la part slovene dal Cuei), si produseve il Picolit, de vît che al selezionà tor de seconde metât dal secul XVIII il cont Fabio Asquini di Feagne, e che Gaetano Perusini di Roche Bernarde al à tornât a meti sul marcjât che nol è tant: un vin colôr dal aur, clâr e cul savôr di pierçul, di armelin madûr e di mîl di agace, di bevilu intant che si fevele o, par Veronelli, intant che si pense.

La produzion dal vin, difindude des malatiis de vît cu la tecniche dai inescj e cul implantâ i vivârs, che si slargjarin ta chê zone tor de metât dal Votcent, e rivà adore a resisti ai dams che la Grande Vuere i fasè ai vignâi. La ricercje enologjiche le à puartade a nivei di cualitât cetant alts. I vins dal Cuei, ancje in graciis di operazions che a àn leade la produzion al marcjât, si ju bêf par dut il mont e "metodi Cormòns" al è il non di une procedure di valutazion de cualitât de ue, un grum cognossude e inventade culì te Cantine dai Produtôrs.

Implantade tal 1978, la Cantine e prodûs, dal 1985 in ca, il Vin de pâs, un vin blanc fat cun 540 varietâts di ue che e rive dongje di dut il mont e che ogni an al ven mandât a ducj i cjâfs di Stât, in butiliis cun etichetis disegnadis di artiscj nomenâts.

Dongje des varietâts selezionadis si cjatin ancjemò vins blancs e neris di produzion ordenarie, in vendite vie pal unvier e sui prins mês de vierte, no travasâts. Ordenaris o di cualitât, i vins a compagnin il mangjâ dal puest, a voltis preparât cun jerbis cjapadis sù pai prâts e cun pomis di bosc, dute robe salvadie.