Palazzo Locatelli - Piazza XXIV Maggio, 22 - Tel 0481.637111, Fax 0481.637112


Ricercje

Ricercje svelte

Ricercje avanzade





Itinerari 5

Da la S.S. 56 si rive tal borc rurâl di Borgnan, lis glesiis di Sante Foscje Gnove e Vecje e il cuel di Migjee. Po si va indenant viers Angoriis e il borc di Muntisel e di li si torne a Cormons.

Legenda
Legenda

Descrizion

Segnât di cartei a pueste, si lasse daûr il sotpàs de ferovie e la S.S. 56 il percors si svilupe te zone in plan delimitade a meridion dal cuel di Migjee, a soreli a mont dal cors dal Judri e a soreli jevât da lis piçulis culinis de Boatina, di Spesse e di Russiz, che a àn terens di ponche e arenarie, otims pe coltivazion de vît. Te antighitât la planure e costituive une valade plui profonde, dopo e fo jemplade di sediments e gleriis, i prins derivâts dal dilavament des culinis, lis secondis puartadis dai flums Judri e Verse. Destinade par tradizion aes culturis di blavis, vuê e fâs part dal bacin che tal 1974 al à vût ricognossude la denominazion di origjin controlade “Isonzo” e che apont al cjape dentri i vignâi tacâts ae strade tra Cormons e Migjee, cun Angoriis e lis dôs culinis di Pecol e Muntisel. Lant indenant a traviers de campagne si rive a Borgnan, situât in planure cirche a un chilometri e mieç da la S.S. 56.

Il borc al è agricul, svilupât intor a la place dulà che e je la glesie di Sante Foscje Gnove.

Lâts vie di Borgnan, si va indenant viers Angoriis, dulà che e je la vile che e je, come dute la tignude, ae famee Locatelli.

La vile, che in origjin e jere di doi plans, e dulà che un tierç al fo zontât tal principi dal secul XX, e à la plante in forme di U e une grande terace su la façade principâl, dute cuvierte di elare. Si rive li passant par un viâl arborât che al va indenant par daûr dal edifici viers il borc di Muntisel. Par chest la sô costruzion, fate prime dal 1736, si pues metile dentri, compagn di chê de glesie de Beade Vergjine dal Socors su la mont Quarin, tra i intervents di sistemazion dal paisaç che a compagnarin il rinovament dal centri cormonês, fat te epoche baroche. Rivâts li des cjasis di Muntisel, si torne a Cormons, fasint un itinerari che si svilupe simpri in planure.