Palazzo Locatelli - Piazza XXIV Maggio, 22 - Tel 0481.637111, Fax 0481.637112


Ricercje

Ricercje svelte

Ricercje avanzade





cartina Itinerario 1

Itinerari 1

Di Cormons al borc rurâl di Breçan, po viers la glesie di San Roc e il borc rurâl di Insic, cu la glesie di San Stiefin protomartar e il Palaç di Manzan, po dopo viers il flum Judri cul Mulin Gnûf e infin la glesie medievâl di San Quarin, par po tornâ a Cormons.

Legenda
Legenda

Descrizione

Il paisaç in plan che si travierse percorint in biciclete il prin dai itineraris proponûts al aparìs cambiât in maniere profonde rispiet al antîc asset dal teritori.

Il disen une vore regolâr dai filârs des vîts al ven indenant des clevis des alturis viers la planure e ca si alterne cul percors dai cjamps, destinâts pe plui part ae culture de blave.

Lassade Cormons, l’itinerari al va indenant in direzion Nord-Nord Ovest viers Breçan, dulà che si pues rivâ a traviers dal percors cicloturistic B2 o de S.S. 356 che e cor paralele.

Si ca viers il borc di Insic, toponim che par furlan al à un grum di variantis: di fat oltri a Insic, a son Assic, Essic, Insec, Iassic. Il paîs al à origjins che forsit a van indaûr ae epoche langobarde. Vuê al è un tipic centri rurâl, cun cjasis furnidis di rustics tacâts e grandis corts internis, metudis ator a une place che, dal Votcent, in pratiche e je restade compagne. Su la strade che e va viers il centri dal paîs al è il retangul compat dal Palaç di Manzan. Li al è nassût Francesco di Manzano (1801-1895), autôr dai "Anâi dal Friûl".

Prime di lâ vie di Insic si à di viodi la glesie di San Stiefin, cuntune struture fate prime dal Cuatricent, cuntune aule sole e cul presbiteri cuadrât.

Passant par terens glereôs, interessâts dal fenomen de feretizazion, il percors al va viers il Judri. Il flum al somee fat a pueste par segnâ il confin. Ae estinzion dai conts di Gurize, che ca a vevin dominis che a jerin stacâts di chei dai patriarcjis di Aquilee, il so cors inferiôr al segnà il confin tra i Asburcs e Vignesie. Puartât sul Lusinç te epoche di Napoleon, chest al le indaûr une altre volte fin al Judri tal timp de Restaurazion e al fo confermât da la pâs sierade a Viene daspò de tierce vuere pe indipendence taliane, tal 1866. Al deventà flum "interni" cuant che al jere il Ream di Italie daspò de prime vuere mondiâl e daspò de seconde al tornà a segnâ il confin, par chel che al rivuarde la part plui alte dal so cors. Te zone di Breçan e Insic une grande curve e done une maestât inspietade al piçul flum, che al riflet lis imagjins voltadis dai arbui su lis rivis e dal cîl cui nûi.

In localitât Molin Gnûf, l’edifici dal mulin al fâs vignî iniments la edilizie rurâl, te sielte dai materiâi e des tecnichis di costruzion. Il fabricât, componût di plui cuarps, al rive su la roie, che e met in funzion il mecanisim des trê palis, ben conservât.

Il percors al va indenant, su strade blancje, te direzion de glesie di San Quarin, dulà che e fo firmade la famose pâs dal 1202 tra il cont Mainart II di Gurize e il patriarcje di Aquilee Pelegrin II. La glesie, tornade a fâ tal Votcent, vuê e je disconsacrade, cence cuviert e rivistide di rampighins, sierade intor di une rêt metaliche. Simpri vie pal percors cicloturistic B2, si torne a Cormons.

La schede e je gjavade fûr di:

"Cormòns"
I luoghi, la storia
e l’agriturismo,
Lucia Pillon
edizione LEG, 2003